Uncategorized

ሰለሞን ባረጋ፣ መሰረት በለጠ እንዲሁም መስከረም ማሞ ከ20ዓመት በታች ምርጥ አትሌት የመጨረሻ 5 እጩዎች ዝርዝር ውስጥ ተካተቱ

ከ3 ሳምንታት በኋላ በሚካሄደው የአለም አቀፉ አትሌቲክስ ፌዴሬሽን አመታዊ ሽልማት ላይ ከ20ዓመት በታች ምርጥ አትሌቶችን አወዳድሮ በሚሸልመው ‘Rising Star’ ዘርፍ የመጨረሻ ዕጩ የሆኑ 5 አትሌቶችን በሁለቱም ፆታዎች ይፋ ሆነ፡፡

በሴቶች 2 ኢትዮጵያውያን አትሌቶች ዕጩ ሆነዋል፡፡ በ2018 እ.ኤ.አ. በግማሽ ማራቶን ከ20ዓመት በታች ካሉ አትሌቶች 1፡07፡51 የሆነ ቀዳሚ ሰዓት ያስመዘገበችው መሰረት በለጠ  አንዷ ናት፡፡ መሰረት የጉተንበርግ ግማሽ ማራቶን አሸናፊ ስትሆን የIAAF ግማሽ ማራቶንን 6ኛ ደረጃን ይዛ ያጠናቀቀች ስትሆን በቡድን የወርቅ ተሸላሚ መሆንም ችላ ነበር፡፡፡

ከመሰረት ጋር ዕጩ ውስጥ የተካተተችው ሌላዋ ኢትዮጵያዊት አትሌት መስከረም ማሞ በበኩሏ በ300 ሜትር 8፡33.63 እንዲሁም በ5000 ሜትር 15፡05.21 በሆኑ ሰዓቶች ከ20ዓመት በታች ካሉ አትሌቶች ቀዳሚ ነች፡፡ በአፍሪካ ሻምፒዮና ላይም የነሐስ ተሸላሚ ነበረች፡፡

ኬንያዊቷ ሴልፊን ቼስፖል፣ አሜሪካዊቷ ሰድኒይ ማክላፍሊን እንዲሁም ጀማይካዊቷ ብሪያና ዊሊያምስ የተቀሩት 3 ዕጩዎች ናቸው፡፡

በወንዶች ዘርፍ በ5000 ሜትር ዳይመንድ ሊግ ከ20 ዓመት በታች ምርጥ ሰዓት የሆነውን 12፡43.02 በማስመዝገብ አሸናፊ የነበረው ሰለሞን ባረጋ በዕጩነት መካተት ችሏል፡፡

ሰለሞን በ2018 እ.ኤ.አ. በዓለም 3000ሜትር የቤት ውስጥ ውድድር የብር ሜዳልያ ተሸላሚ የነበረ ሲሆን በዓለም ከ20ዓመት ሻምፒዮና ላይ 4ኛ ሆኖ ማጠናቀቁ ይታወሳል፡፡

ጆርዳን ዲአዝ ከኩባ፣ አርማንድ ዱፕላንቲስ ከስዊዲን፣ ጃኮብ ኢንግብሪትስን ከኖርዌይ እንዲሁም ሮኔክስ ኪፕሩቶ ከኬንያ የተቀሩት 4ዕጩዎች ሆነው ቀርበዋል፡፡